طبعا كلنا سمعنا واتصدمنا من خبر طبيبة الأسنان الشابة , اللى عمرها 25 سنة, اللى الله يرحمها توفيت منتحرة قفزا من الدور السادس لمول سيتى ستارز.
الغريب فى الأمر إن المنتحرة كانت مع صديقتها قبل انتحارها مباشرة, وكانت متضايقة جدا وقالت لصديقتها إنها نوت الإنتحار‼
وصديقتها يبدو إنها مخدتش كلامها على محمل الجد, وسابتها وقامت روحت‼
وبعد إنصراف صديقتها, المرحومة فضلت تعيط شوية, وبعدين قفزت من الدور السادس‼
الأغرب إن اسرة البنت كانوا ملاحظين إنها بقالها فترة مكتئبة , وبناء عليه أبوها أخدها يفسحها فى سيتى ستارز, إلا إنها أصرت إنها تدخل المول لوحدها, وقالت لأبوها إن واحدة صاحبتها منتظراها جوه‼
وأبوها فعلا سابها تدخل لوحدها‼
طبعا هو مجاش فى باله إنها ممكن تكون ناوية تنط من الدور السادس‼
بعيدا عن الأسباب اللى ممكن تكون دفعت البنت للإنتحار, واللى ممكن أى حد مننا يشوفها أسباب تافهة, إيه يعني أهلها خايفين عليها وبيمنعوها تخرج براحتها, ماهو من كتر ما بيسمعوا عن وقائع الخطف والسرقة والإغتصاب وغيره ‼
وفيما يبدو إنه طريقتهم فى منعها كانت من وجهة نظرها بتشكل ضغط نفسي سببلها اكتئاب ‼
حسب شهادة أسرتها وأصحابها, البنت كانت بقالها فترة مكتئبة ومتضايقة ومخنوقة ‼
فبالمناسبة دى, مهم أقول لحضراتكم حاجة محدش عارفها‼
المنتحر يا جماعة, مبيقررش الإنتحار بالبساطة اللى الناس متخيلاها, يعنى مبيبقاش قاعد كده طبيعي وعادى وفجأة يقوم يقفز من البلكونة أو يرمى نفسه فى النيل أو يشرب سم أو يضرب نفسه بالرصاص مثلا‼
الإنتحار أو إزهاق الروح قرار مش سهل, الشخص قبله بيمر بصراع نفسي رهيب, وهو نفسه بيحاول بينه وبين نفسه إنه يلاقى أى حل غيره, وبيفضل يفكر ويصارع نفسه, لغاية ما يوصل للحظة اللى يغيب فيها عقله, ويبقى مش شايف قدامه أى حل غير إنهاء حياته‼
أى واقعة انتحار, لما تسأل معارف المنتحر بيقولوا إنه بقاله فترة مش طبيعي, شارد وسارح ومتشائم ومكتئب وديما يا ساكت يا بيبكي‼
متفهمش ليه مبيفكروش إنه ممكن ينتحر‼
المنتحر قبل انتحاره على فكرة بيستغيث باللى حواليه, بينبههم بشكل لا إرادى إنه ناوى ينتحر علشان يلحقوه‼
ساعات تلاقيه ديما بيتكلم عن الموت, وان الحياة ملهاش أى قيمة, وإن اللى بيموت المفروض نفرحله مش نحزن عليه, وإنه شخصيا نفسه يموت‼
أحيانا بيتكلم عن انه شايف نفسه ميستحقش يعيش‼
أحيانا بيتكلم عن ان محدش هيحس بيه ولا يعرف قيمته غير لما يموت‼
أحيانا يقول إنه مبقاش عارف ولا عايز يعيش فى وسط الناس, حاسس إنه لا الناس عاوزينه ولا هو عاوزهم‼
أحيانا بينعزل عن المحيطين بيه وبيعتزل الحياة بكل تفاصيلها, ببساطة بيوصل للصورة الكاملة للإكتئاب‼
أحيانا يعمل العكس ويبقى ديما عاوز يفضل فى وسط الناس, ويقولك انا خايف اقعد لوحدي‼
وأحيانا لو سألته ليه تلاقيه بيقولك انا لو قعدت لوحدى هتجنن, أو هعمل فى نفسي حاجة‼
أحيانا بيقول صراحة للناس اللى بيحبهم أو القريبين منه, إنه ناوى ينتحر‼
هو طبعا مش بيعمل كده من باب إنه يبلغكم قراره والسلام, مش من قبيا العلم بالشىء يعني‼
هو بيعمل كده علشان ينبهكم, يلفت نظركم, علشان تلحقوه وتنقذوه من نفسه اللى هو مبقاش عارف ولا قادر يتعامل معاها‼
الغريق لما بيصرخ مش بيصرخ علشان يعرف الناس انه بيغرق والسلام ?, هو بيصرخ علشان الناس يلحقوه وينقذوه من الغرق‼
المنتحر مش مجرد شخص أتضايق شوية فموت نفسه‼
ده أحيانا بيفضل شهور متتالية بيفكر فى الإنتحار‼
فيا جماعة لما تلاقوا حد من أسرتكم أو معارفكم أو اصحابكم, مكتئب, ومخنوق وديما بيتكلم عن الموت, وعن إنه عاوز يخلص من الدنيا واللى فيها‼
وتلاحظوا إنه فات يوم واتنين وتلاتة وعشرة والفكرة مسيطرة عليه ومبيتكلمش فى حاجة غيرها بشكل أو بآخر, متاخدوش الموضوع ببساطة وتطنشوا وتقولوا أهم شوية زعل وهيعدوا‼
على الأقل خليكم جنب الشخص ده, إدعموه ولو بمجرد وجودكم جنبه!!
ولو حسيتوا إن الموضوع خارج عن السيطرة, وإن الشخص ده مش عارف يعدى أزمته دى, ولا انتوا عارفين تساعدوه, مش عيب ولا حرام إنكم تقترحوا عليه يراجع طبيب نفسي‼
